Акафисты и молитвы преподобному Паисию Святогорцу
Тропарь преподобному Паисию Святогорцу
Глас 5. Подо́бен: Собезнача́льное Сло́во:
Боже́ственныя любве́ о́гнь прие́мый, / превосходя́щим по́двигом вда́лся еси́ весь Бо́гови, / и утеше́ние мно́гим лю́дем был еси́, / словесы́ боже́ственными наказу́яй, / моли́твами чудотворя́й, / Паи́сие Богоно́се, / и ны́не мо́лишися непреста́нно // о всем ми́ре, преподо́бне.
Кондак преподобному Паисию Святогорцу
Глас 8. Подо́бен: Взбра́нной:
А́нгельски на земли́ пожи́вый, / любо́вию просия́л еси́, преподо́бне Паи́сие, / мона́хов вели́кое утвержде́ние, / ве́рных к житию́ свято́му вождь, / вселе́нныя же утеше́ние сладча́йшее показа́лся еси, / сего́ ра́ди зове́м ти: // ра́дуйся, о́тче всеми́рный.
На Господи, воззвах стихиры, глас 1.
Подобен: Всехвальнии мученицы:
Храм себе творяй светел/ Духа Святаго,/ и благоухание сый Христу, Паисие/ ко твоей каливе приходящих/ возрадовал еси,/ всех освятив, преподобне,/ твоего благословения просящих,// яко да преидут многоволненную жития пучину.
Мудраго Арсения добродетели подобниче,/ во отечествии твоем просиявшаго,/ и многих старцев, подвижников Афонских,/ светлей любве поревновати хотя,/ лествицу совершенства во Христе/ постиже всечестне/ и яко новая звезда,// ныне возшел еси.
Паисие, благодать богатную/ с небесе приял еси,/ во еже помощи всем страждущим/ и в нуждах сущим,/ тем во обстояниих посещаше болящия,/ и сим скорую цельбу, Божиею благодатию дароваше,/ ко Господу являя дерзновение,// егоже стяжал еси.
Тропарь преподобному Паисию Афонскому (Эзнепидису),
глас 3. Подобен: Божественныя веры:
Якоже Ангел явúся мúрови/ во времена послéдняя,/ христоподражательне Паúсие преподóбне,/ подвúжнически бо во Афóне пожúв,/ яко пресвéтлое сóлнце возсиял есú/ и озарúл есú/ вéрных полноту благодатию,// глагóлы предúвными и чудесы.
Источник и и литература
Перевод стихир выполнен по службе, составленной греческим песнописцем господином Харлампием.
Перевод тропаря преподобному старцу Паисию Афонскому (Эзнепидису) выполнен с греческой службы, составленной митрополитом Эдесским Иоилем.
Молитва преподобному и богоносному отцу нашему Паисию Святогорцу
О, святый преподобне и богоносне отче наш Паисие, возлюбленный наш покровителю и богомудрый наставниче, по лествице добродетелей возшедый от бытия земнаго в Царствие Небесное и получивый благодать предстательствовати за ны пред Троном Всемилосерднаго Господа нашего; сице молим тя: отврати нас от пути грехов наших и научи нас Господеви приносити совершенныя плоды покаяния и обновления во Христе душ наших.
Отче святый, во дни земнаго жития твоего многия тяжкия болезни и недузи неизцельныя уврачевавый, души от греха и скорбей страждующия исцеливый; ныне же предстоя пред Богом, преклони Его милосердие к нам, да твоего предстательства ради исцелит и нас, с любовию чтущих святую память твою, и дарует нам крепость в искушениих, мужество в борьбе с духом злобы, ищущим вечней погибели нашей, да дарует нам прощение всех наших грехов, иже от юности нашея до настоящего дня мыслию, словом и делом сотворихом, да научит нас, что подобает нам творити, дабы выну Ему служити, яко подобает ближним нашим с любовию и смирением служити.
Ей, отче святый, настави нас, по примеру святаго жития твоего, любви и самопожертвования исполненнаго, отвергшись пут греховнаго жития, взыти к Небесным чертогам, идеже восхвалим Всемилосерднаго Триипостаснаго Господа нашего во веки веков. Аминь.